Genesis 28
1Xe Aisaki muavuti la mu'avalou 'olu Iakovo mulai noxou sou mualusou la muvikalanu pekia'u aloxo 'o, “Mamu na'uluxe semasie Kanani vile. 2Nalai ne Mesopotamia no tuala noxou xasine mo sou na'uluxe sema vile lai ne, iameni Lavani 'olu. 3Lataua anu xaviinu misevile, molu uxolu noxine mo molu ualusou taula'ixene mo molu ulosine ta 'iline tavu'alo mo sou ulai ili'i la ta mitema tavu'alo no xalexalee tuautala ne'eine'ei ne mami'a ane nini. 4 aAnu molusi ualusinge ngongi'a ta 'ili'iline mo ta xasixasine ilo'a ta 'ilu'ilusuneni aloxo anu mualusou Avalaamu. La sou ulai ili'i la nini natatananu lia ane nini nexoo no anu 'o. Lia ano 'o Lataua mu'italonu noxou Avalaamu.” 5Aisaki muvikalanu 'olu Iakovo aloxo ne mukalu la mupalusou sou mulai ne Mesopotamia noxou Lavani. Lavani momu ane Betueli. Anu itemasie Alamu. 'Olu sema ane Liveka, eiae Iakovo ilou Esau neni'a.6No voxo ane Esau mulomu lexe momu Aisaki mualusou vimou Iakovo mo mupalusou mulai ne Mesopotamia sou ulai u'uluxe sema vile lai ne, la anu mulavu kalumo lexe no voxo ane anu Aisaki mulingau Lataua sou uxoo noxou Iakovo, la anu mupela'u lexe mamu ulai ili'i la u'uluxe sema vile ne Kanani. 7La mulavu kalumo lexe vimou Iakovo mulomuxu vaikala noxi'a momu ilee nenu la sou ane anu mulai ne Mesopotamia ne. 8Tava'u aloxo ne la sou anu Esau mulavu lexe momu Aisaki umasaxai'a ta semasie Kanani uasi. 9Ioxe, anu soxu muavuti la mulutu mulai noxou Isimaeli e Avalaamu 'olu ilo'a ta 'olu. Mulai muxolu ane la sou mu'uluxe sema vile la. Ualasie lexe Makaleti, Isimaeli 'olu. Vimoe mulu ualasou lexe Nevaiote.
Iakovo Muaipiepiena ne Veteli
10Iakovo mulutu ne Beru-seva sou mulai ne Alani, 11la mumuamua'i xoo mole anu asou 'olo'olovoxo. Mumuamua'i mulai xe aso mulolo, la muxali no lia xalee vile, la mutalupexa sou muai ane. Muavuti la muno'u lavo'o vile sou mutixalaxu. 12 bNo 'olovoxo, la muaipiepiena lexe mumaisou teetelo vile mutulu no lia la mulai muxali avile teitexi no loxotolo, mo ta angelo noxou Lataua ilulu'e itetelo no anu. 13 cXe iou muvaxa la mumaisou Lataua mune'e mutulu no pa'umolu. Xe muavuti la muvikala aloxo 'o, “Eni IAUE, Lataua noxou Avalaamu ilou Aisaki. Ulai ili'i la eni alosinge ngongi'a ta 'ili'iline mo ta xasixasine ilo'a ta 'ilu'ilusuneni lia ane nini naai no latanu 'o. 14 dTa 'ili'iline ilo'a ta xaisxasine mo ta 'ilu'ilusuneni ne itiitisi'a uxali tavu'alo loxo lialia no lia 'o. Xe ulai ili'i, la sou ane'i isukusukunu pilipilixasou lialiaxa'a 'o ulai umomoxu atume iou tami'a o sou ilai ixolu no anu. Eni aalusi'a ta mitema no xalexalee tuatuala ukalusi no anu vote'i vilesisi. Vote'i ane ne, nini ta 'ili'iline mo ta xasixasine ilo'a ta 'ilu'ilusuneni. 15Mo nalomu la, eni axolu noxine mo asaxila'ine no anu muamua'ixene no xalexalee tuatuala ane nini nalai no anu. Xe ili'i, la alivulixene une'e no lia 'o. Umomomo sou eni a'umesine uasi, axoo noxine mo sou mimii e eni elemolu lexe eni a'oxo noxine ne uxali maninasou.”16Aliku 'o mukuluke xe mutulu la mutalupexa xe tanu tema, la sou muvikala aloxo 'o, “Manina, IAUE a uxoo no lia xalee se ane eni eai mo ane axoxoo no anu 'o, ia eni alavusou uasi.” 17Mumama'u misevile, la sou muavuti la muvikala aloxo 'o, “Eni emama'u misevile xo tuala ano 'o, iou vilemo. Anu Lataua taasou ano 'o, mo aitengasou ane mukisi mulai teitexi no opo loxotolo e emaisou 'o.”
18Muai ne xe mutulu no kakau no sivo, la muno'u lavo'o e mutixalaxu no 'olovoxo sou mulaanu mulu'elai no lia, loxo atola sou sosovo. Mutulusou mukalu la munixi'u ovu vile lexaxu no latanu sou musosovosou tani ano 'o lexe Lataua na'u. 19Xe ili'i, la sou mumoxo'u lia xalee ane lavo'o kisou mutulu no anu ne lexe Veteli. Tei la ilemolu tuala xalee ane ne lexe Lusu. 20Xe Iakovo muavuti la mupala'alixu tanu mulai noxou Lataua, la muvikala aloxo 'o, “Lexe nini naxoo noxilo mo nasaxila'ilo no anu muamua'i noxilo ano 'o, mo naitixo la'ilali ilou tokolomo 21mo lexe eni alivu mo alai axali noxou mamilo taasou, la sou nini Lataua noxilo manina. 22Lavo'o kisou e e'asixu ne, anu sosovo lexe nini taasine ane. Xe ulai ili'i la mimii ma'ima'i ane nini nalosilo mo naitixo ne, eni akalipala'anu la nini na'a nini pa'usou sevile loxo vile no anu mavulovexa ane eni alosine ulivu ulai noxine.”
Copyright information for
ATA